Plan Innovación empresarial

Programa 24

No contexto actual de crise, a innovación empresarial xoga un papel crucial para manter e potenciar a riqueza dunha comunidade. As compañías que invisten en innovación e desenvolvemento crecen preto dun 20%  máis que as súas rivais. O tecido empresarial galego conta con máis de 200.000 empresas. A súa supervivencia é a de todos.

Entrevista. Xavier Marcet é socio fundador e conselleiro delegado de LTC Project, empresa especializada en proxectos de estratexia, innovación e comunicación corporativa.  Licenciado en historia pola Universidade Autónoma de Barcelona e diplomado en xestión pública por ESADE, Marcet está especializado en desenvolver modelos de innovación para empresas, administracións e universidades. Como consultor internacional levou a cabo proxectos nos Estados Unidos e en Inglaterra, Francia, Suíza, Arxentina, Chile, Venezuela e México, ademais tamén é profesor asociado da Universidade Pompeu Fabra.
Monólogo. O ser humano, innovador por natureza
Post de Wicho. Internet a ferramenta da innovación
Reportaxes:
- Plan Innovadores en empresas

Os ceos galegos

Programa 23

Se miramos ao ceo nunha noite despexada, a simple vista podemos ver unhas 2.000 estrelas; un espectáculo que atraeou desde sempre os humanos na procura de respostas. Os astros marcaron as estacións do ano, as épocas de abundancia para a caza e a colleita, as mareas… E nos seus movementos aínda queda moita información por descubrir. 

Entrevista. José Angel Docobo é director do Observatorio Astronómico Ramón María Aller da Universidade de Santiago de Compostela.
Monólogo. A influencia da astronomía no desenvolvemento da ciencia
Post de Wicho. Ferramentas tecnolóxicas para observar o ceo
Reportaxes:
- Arqueoastronomía
- Observatorio Forcarei

Videoxogos

Programa 22

Cantar, facer deporte, adestrar o cerebro… O xogador actual de videoconsolas está lonxe da imaxe tradicional dunha persoa sentada premendo nos botóns. A industria dos videoxogos atrae xa en España preto de dez millóns e medio de persoas, e factura uns 12.000 millóns de euros ao ano. Un sector en aumento grazas ás novidades, que buscan fomentar o xogo en equipo e en rede.

Entrevista. Beatriz Legerén é xerente de Interacción, empresa independente de comunicación interactiva con sede en Vigo, e na actualidade está a escribir a súa tese sobre “Televisión interactiva e videoxogos”. Licenciada en xeografía e historia e máster en business administration, desde 1991 Legerén traballa nas posibilidades que ten a tecnoloxía para comunicar máis e mellor. Como produtora executiva desenvolveu o guión e o deseño de diversos videoxogos para internet, teléfono móbil e televisión interactiva.

Monólogo. Videoxogos e capacidades cognitivas
Post de Wicho. Ferramentas tecnolóxicas para xogar
Reportaxes:
- Small Wonders
- Continental

Retos médicos

Programa 21
Os retos estimúlannos a avanzar, e máis cando falamos de saúde, o segundo tema que máis preocupa os galegos despois do traballo. Por diante temos por desenvolver o diagnóstico de enfermidades grazas á xenética, o tratamento específico de enfermidades mentais, os avances tecnolóxicos na saúde ou a telemedicina.

Entrevista. Jesús Devesa é catedrático de fisioloxía humana na Universidade de Santiago de Compostela, xefe do laboratorio de bioquímica especial do Hospital Clínico Universitario da mesma cidade e especialista en endocrinoloxía. Desde 2005 é asesor médico da fundación Foltra, pioneira no uso da hormona do crecemento para tratar danos cerebrais e medulares. Foi director de 19 teses de doutoramento e autor de 123 publicacións en revistas científicas nacionais e internacionais, e presentou máis de 400 comunicacións e relatorios en congresos nacionais e internacionais.
Monólogo. Seudomedicina
Post de Wicho. Implantes artificiais
Reportaxes:
- Fundación Galega de Medicina Xenómica
- Centro Tecnolóxico do CHUAC

Imaxes na rede

Programa 20

Recorremos ás imaxes para contar unha viaxe, un acontecemento; elaborar unha historia; ilustrar unha reportaxe ou, incluso, resumir unha vida. Moita información que hoxe en día salta do computador ao televisor, do televisor ao teléfono móbil, de volta ao computador… Nunca te preguntaches como viaxa toda esa información dun dispositivo a outro?

Entrevista. Víctor Gulías, é responsable do Centro de Investigación en Tecnoloxías da Información e as Comunicacións (CITIC), da Universidade da Coruña. Doutor e profesor titular en informática, Gulías dirixiu numerosos proxectos de I+D autonómicos, estatais e internacionais. Ademais, é o investigador principal do grupo MADS (Models and Applications of Distributed Systems) e promotor da área Media en rede e fogar dixital do CITIC.
Como emprendedor, fundou diversas iniciativas empresariais de base tecnolóxica; a máis coñecida é LambdaStream, creada para a industrialización e a comercialización dos resultados de investigación do servidor de vídeo baixo demanda, VoDKA.
Monólogo. Sistemas de visión
Post de Wicho. Imaxes na rede
Reportaxes:
- On Touch ( publicidad interactiva- Gradiant)
- BluSens

Innovar dende a terra e o mar

Programa 19
A capacidade dun pobo para innovar é o principal motor da súa productividade e do seu crecemento económico. As empresas que invisten en investigación, desenvolvemento e innovación son un 16 % máis produtivas e xeran un 2 % máis de emprego que as que non o fan. Neste eido, Galicia está a facer unha importante aposta.

Entrevista. Antonio García Allut, é director da Fundación Lonxanet para a Pesca Sustentable. Doutor en antropoloxía social e profesor da Universidade da Coruña desde 1992, investiga no campo da pesca a pequena escala.Desde 2001 leva a cabo varios proxectos destinados a promover a sostenibilidade da pesca artesanal en Galicia, en Latinoamérica e no norte de Marrocos.En 2004, García Allut creou a Rede de Comunidades Pesqueiras de Desenvolvemento Sustentable (RECOPADES) e, en 2006, foi premiado por Ashoka en España, unha organización internacional de apoio ao emprendemento social.

Monólogo. Os mamíferos os mais innovadores.
Post de Wicho. A competitividade na rede.
Reportaxes:
- I+D+I de COREN
- Sistema Swapp (Invernadoiros Horsal- Wireless Galicia)

O tempo. Vivir rápido

Programa 18

Nunca te preguntaches en que se che vai o tempo? Segundo as enquisas, as cinco ocupacións principais dos galegos ao longo do día son os coidados persoais, traballar, estudar, estar coa familia e consultar os medios de comunicación.Nos últimos sete anos, cada vez participamos menos en actividades sociais e de diversión, mentres que o tempo que lle dedicamos a internet aumentou máis dun 10 %.

Entrevista. Alberto Pena é escritor, conferenciante e experto en produtividade e xestión persoal. Tamén é profesor colaborador de “executive education” en ESADE Business School.
Alberto Pena cursou estudos de ciencias empresariais e desde1996 escribe en internet, onde na actualidade conta co blog ThinkWasabi. O seu primeiro libro, “Como gestionar mejor tu vida”, da Editorial Libros Libres, saiu publicado no 2009.
Monólogo. Distintas velocidades.

Post de Wicho. A inmediatez.
Reportaxes:
- A arte dos reloxeiros. O reloxo do observatorio astronómico de Santiago de Evangelino Taboada.
- O reloxo do futuro. Reloxos fotónicos.